«Иқтисодий мустақил аёл – фаровон оила сари» 103 нафар хотин-қизга янги имкониятлар яратилмоқда
Бухоро вилоятида хотин-қизларнинг иқтисодий фаоллигини ошириш, уларни касб-ҳунари орқали даромад манбаига эга қилиш ва тадбиркорлик ташаббусларини қўллаб-қувватлашга қаратилган янги ижтимоий лойиҳа амалга оширилмоқда.
Ўзбекистон «Тадбиркорлар ва ишбилармон аёллар» бирлашмаси томонидан «Иқтисодий мустақил аёл – фаровон оила сари» номли давлат ижтимоий буюртмаси доирасида амалга оширилаётган лойиҳа 7 ойга мўлжалланган бўлиб, унда Бухоро шаҳри, Когон шаҳри, Пешку, Бухоро ва Қоровулбозор туманларидан 103 нафар хотин-қиз қамраб олинади.
Лойиҳа Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди маблағларини бошқариш бўйича Парламент комиссиясининг 2026 йил 19 августдаги 01-10/90-сонли қарори асосида қўллаб-қувватланган.
Асосий мақсад — аёлларни даромад манбаига эга қилиш
Лойиҳанинг асосий мақсади ижтимоий ҳимояга муҳтож, кам таъминланган, ишсиз ёки доимий даромад манбаига эга бўлмаган, бироқ муайян касб-ҳунарга эга хотин-қизларни қўллаб-қувватлаш орқали уларнинг иқтисодий фаоллигини оширишдан иборат.
Лойиҳа доирасида иштирокчиларнинг мавжуд касбий кўникмалари ва эҳтиёжлари ўрганилиб, уларга танлаган фаолият йўналишига мос замонавий ускуналар, асбоб-ускуналар ҳамда зарур меҳнат қуроллари тақдим этилади.
Бу эса хотин-қизларга ўзини ўзи банд қилиш, микробизнес ёки оилавий тадбиркорлик фаолиятини йўлга қўйиш учун амалий имконият яратади.
Билимдан — амалий фаолият сари
Лойиҳа иштирокчиларини фақат зарур ускуналар билан таъминлаш эмас, балки уларга тадбиркорлик фаолиятини мустақил юритиш учун зарур билим ва кўникмалар беришни ҳам назарда тутади.
Шу мақсадда иштирокчилар учун тадбиркорлик асослари, бизнес-режа тузиш, молиявий саводхонлик, маркетинг, солиқ ва ҳуқуқий муносабатлар, маҳсулот ҳамда хизматларни бозорга олиб чиқиш каби мавзуларда 5 та назарий ва амалий ўқув-тренинг ташкил этилади.
Машғулотларга тажрибали бизнес-тренерлар, банк ва солиқ соҳаси мутахассислари жалб этилиши режалаштирилган.
Ўқув жараёнини муваффақиятли якунлаган ва бизнес-режаси маъқулланган иштирокчилар лойиҳа бюджети доирасида ўз фаолият йўналишига мос зарур ускуналар билан таъминланади.
103 нафар аёл — 103 та янги имконият
Лойиҳа якунига қадар 103 нафар хотин-қизни тадбиркорликка жалб этиш, уларнинг амалий билим ва кўникмаларини ошириш ҳамда ўзини ўзи банд қилиш учун зарур шароитларни яратиш кўзда тутилган.
Шунингдек, камида 103 та микробизнес ёки оилавий тадбиркорлик фаолиятини ташкил этиш учун имконият яратилиши, маҳаллаларда янги иш ўринлари пайдо бўлишига замин яратилиши режалаштирилган.
Лойиҳа орқали хотин-қизларнинг молиявий ва иқтисодий саводхонлигини ошириш, оилавий даромадларни кўпайтириш ҳамда уларнинг иқтисодий мустақиллигини мустаҳкамлашга эътибор қаратилади.
Лойиҳа натижалари кейин ҳам кузатиб борилади
Ташкил этилган тадбиркорлик фаолиятининг барқарорлиги ва иштирокчиларнинг иқтисодий натижалари лойиҳа якунланганидан кейин ҳам 2 йил давомида мониторинг қилинади.
Бу ёндашув лойиҳа доирасида яратилган имкониятларнинг бир марталик ёрдам сифатида қолиб кетмаслиги, балки хотин-қизларнинг узоқ муддатли иқтисодий фаолиятига хизмат қилишига қаратилган.
«Иқтисодий мустақил аёл – фаровон оила сари» лойиҳаси орқали хотин-қизларнинг касбий салоҳиятини рўёбга чиқариш, янги даромад манбаларини шакллантириш, оилавий фаровонликни ошириш ва маҳаллаларда тадбиркорлик муҳитини ривожлантириш учун амалий шароитлар яратиш кўзда тутилган.
