Бугунги кунда аёлларимизнинг тадбиркорлик соҳасидаги иштироки тобора ортиб бормоқда. “Тадбиркор аёллар орамизда” семинари ҳам ана шу йўналишдаги муҳим қадамлардан бири бўлиб, тадбиркор ва ёш ташаббускор аёлларни бирлаштириш, уларнинг имкониятларини кенгайтириш ҳамда янги ҳамкорлик алоқаларини йўлга қўйишга хизмат қилади.
Тадбиркор аёлларнинг ўзаро тажриба алмашиши, ҳамкорлик алоқаларини мустаҳкамлаши ва янги ғоялар билан илҳомланиши асосий мақсад қилиб белгиланди. Шу билан бирга, семинар иштирокчиларига тадбиркорлик бўйича амалий тренинг ва маслаҳатлар тақдим этилди.
Тадбир эрталаб илиқ суҳбат ва нонуштадан бошланиб, фикр алмашувлар ва тажриба улашиш билан давом этди. Ҳар бир тадбиркор аёл ўз фаолияти ҳақида маълумот берди, муваффақият сири ва самарали йўллари билан бўлишди. Бу эса иштирокчиларга янги илҳом ва қимматли тавсиялар манбаи бўлди.
Семинар якунида иштирокчилардан таклиф ва фикрлар йиғиб олинди. Бу эса келгусидаги тадбирларни янада самарали ташкил этишга замин яратади.
“Тадбиркор аёллар орамизда” тадбири — аёлларнинг фаолиятдаги ташаббусларини қўллаб-қувватлаш, уларнинг куч ва имкониятларини бирлаштириш йўлидаги муҳим ташаббусдир. Бугун бирлашган тадбиркор аёллар эртанги кунни янада ёрқинроқ қила олади.
