Жорий йилнинг 19 март куни ижтимоий тармоқларда “FUQARONI PULINI BERMAYOTGAN AMALDORLAR“ номли хабар жойлаштирилган.
Мазкур ҳолат юзасидан Бош прокуратура ҳузуридаги Мажбурий ижро бюроси Бухоро вилояти бошқармаси томонидан ўрганилди.
Аниқланишича, фуқаролик ишлари бўйича Бухоро туманлараро судининг 14.12.2022 йилдаги ижро варақасига асосан қарздор Бухоро шаҳар ҳокимлигидан қонунчиликда белгиланган тартибда ундирувчи Б.У.Наврузов фойдасига ер участкасининг давлат ёки жамоат эҳтиёжлари учун олиб қўйилиши муносабати билан 157.925.947 сўм компенсация тўлови, экспертиза харажати учун тўланган 3.402.000 сўм, давлат божи учун тўланган 6.317.038 сўм ва почта харажати учун тўланган 21.000 сўм, жами 167.665.985 сўм ундириш тўғрисидаги ижро ҳужжати Бюронинг Бухоро шаҳар бўлими иш юритувига 23.02.2023 йилда келиб тушган ва давлат ижрочиси томонидан шу куни Ўзбекистон Республикаси “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 23-моддасига асосан ижро иши юритишни қўзғатиш тўғрисида қарор қабул қилиниб, ижро ҳаракатларига киришилган.
Ижро ҳаракатлари давомида қарздор Бухоро шаҳар ҳокимлигининг Бухоро шаҳар ғазначилик бўлимидаги барча бюджет, бюджетдан ташқари ва махсус ҳисоб рақамларининг чиқим қисмига банд солиниб, қарздорнинг балансида бўлган 7 та автотранспорт воситалари ҳамда 133 та кўчмас мол-мулкларига нисбатан таъқиқ қўйилган.
Ўзбекистон Республикасининг 29.06.2022 йилдаги “Ер участкаларини компенсация эвазига жамоат эҳтиёжлари учун олиб қўйиш тартиб-тамоиллари тўғрисида”ги 781-сон Қонунни ҳамда Вазирлар Маҳкамасининг 26.12.2018 йилдаги “Жисмоний ва юридик шахсларга етказилган мулкий зарарларни компенсация қилиш бўйича мақсадли жамғармалар маблағларини шакллантириш ва улардан фойдаланиш тартиби тўғрисида”ги 1047-сон қарори талабларига кўра, етказилган зарарлар ҳудудий жамғарма маблағлари ҳисобидан қопланиши белгиланган.
Ҳозирда, мазкур жамғарма маблағлари ҳисобидан компенсация тўловини ундириб бериш бўйича ижро ҳаракатлари олиб борилмоқда.
Бюронинг Бухоро вилоят бошқармаси
